सार्वजनिक वाचनालय, नाशिक बालभवन साने गुरुजी कथामाला यांच्या तर्फे कै. रत्नाकर गुजराती स्मृतीप्रित्यर्थ आयोजित करण्यात आलेल्या बालनाट्य स्पर्धेत मातोश्री चंद्रभागाबाई व अयोध्याबाई चांडक कन्या विद्यालयाच्या ‘सेल्फी’ या एकांकिकेने घवघवीत यश संपादन केले.
ग्रामीण विभागातून सादर करण्यात आलेल्या या एकांकिकेला ग्रामीण विशेष पुरस्कारासह प्रथम क्रमांक मिळविण्याचा मान लाभला. या उल्लेखनीय कामगिरीबद्दल विद्यालयास रु. १००१/- चे रोख पारितोषिक व आकर्षक सन्मानचिन्ह प्रदान करण्यात आले.
‘सेल्फी’ या एकांकिकेचे लेखन व दिग्दर्शन संयुक्ता कुलकर्णी यांनी केले असून त्यांच्या संवेदनशील आशयमांडणीने व प्रभावी दिग्दर्शनाने नाट्यकृतीला विशेष उंची प्राप्त झाली. एकांकिकेतील संगीत संयोजन दीपक गायकवाड यांनी समर्थपणे साकारले, तर नेपथ्य रचना सोनाली मोरे यांच्या कल्पकतेमुळे रंगमंचीय सादरीकरण अधिक जिवंत व परिणामकारक ठरले.
एकांकिकेतील उत्कृष्ट व भावपूर्ण अभिनयासाठी कु. आरोही ठोके व कु. सादिया फकीर यांना उत्कृष्ट अभिनयाचे पारितोषिक देऊन गौरविण्यात आले.
या यशामागे विद्यालयाच्या मुख्याध्यापिका सुनिता कर्डिले, शालेय समितीचे अध्यक्ष अॅड. श्रीराम क्षत्रिय, पालक-शिक्षक संघाचे उपाध्यक्ष गोरक्ष सोनवणे तसेच पर्यवेक्षिका सुवर्णा सोनवणे यांचे मार्गदर्शन, प्रोत्साहन व सहकार्य मोलाचे ठरले.
या दैदीप्यमान यशामुळे चांडक कन्या विद्यालयाच्या सांस्कृतिक परंपरेला नवी ओळख मिळाली असून ग्रामीण विद्यार्थिनींच्या कलागुणांना नवे पंख लाभले आहेत.
