नाशिक (प्रतिनिधी) : विश्वास ग्रुप व महाराष्ट्र साहित्य परिषद पुणे, शाखा जलालपूर, नाशिकतर्फे चित्रपट प्रेमींसाठी ‘सिनेमा कट्टा’ उपक्रमांतर्गत *शुक्रवार 11 जुलै2025* रोजी सायंकाळी 6:00 वाजता सुप्रसिद्ध बंगाली दिग्दर्शक श्रिजित मुखर्जी.यांचा *निर्बाक* हा चित्रपट दाखविण्यात येणार आहे. सदर चित्रपट डिझास्टर मॅनेजमेंट सेंटर अॅण्ड ट्रेनिंग हब (विश्वास गार्डन शेजारी), ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूर रोड, नाशिक येथे दाखविण्यात येणार आहे.आदिवासी कथांमध्ये, प्राणी बोलतात, झाडं बोलतात, सारं चराचर विश्व बोलतं. त्यातून आपलं आपल्या परिसराशी, परिवेशाशी असलेलं नातंच व्यक्त होत असतं. आता विज्ञानयुगात होमो सेपियन्स शिवाय इतर कुणालाही भाषा अवगत नाही, इतर सारे चराचर विश्व शब्दहीन आहे हे सर्व मान्य झालंय. मान्य. पण शब्द नसले तरी भावना असल्या तर? प्रेम, राग, लोभ, द्वेष सगळ्या भावना आहेत फक्त त्या व्यक्त करायला शब्द नसतात एवढंच!हे गृहीत घेऊन निर्बाक मध्ये श्रीजित आपल्याला चार प्रेमकथा सादर करतात. या चारी प्रेमिक जोड्यांमध्ये एकजण शब्दहीन आहे. एक आरशातली प्रतिमा. एक झाड, एक कुत्री आणि, होय, एक प्रेत. श्रीजित काय करू इच्छितायत हे आपल्याला जाणवतं, सर्वच कलाकारांची कामं चोख आहेत, पण अंजन दत्त यांचा स्वतःच्या शरीरावर, प्रतिमेवर प्रेम असलेला गोम्स आणि ऋत्विक चक्रबोर्ती यांचा शवागार सेवक मृत्युंजय कर्मकार बहार आणतात. या सिनेमाचा कालावधी 1 तास 48 मिनिटांचा आहे.सदर कार्यक्रमासाठी विश्वास को-ऑप. बँक लि. नाशिक, विश्वास ज्ञान प्रबोधिनी अॅण्ड रिसर्च इन्स्टिट्यूट, नाशिक, रेडिओ विश्वास 90.8 कम्युनिटी रेडिओ, महाराष्ट्र साहित्य परिषद, पुणे, शाखा जलालपूर व विश्वास टर्फ यांचे सहकार्य लाभले आहे. हा चित्रपट पाहण्यासाठी जास्तीत जास्त संख्येने उपस्थित राहण्याचे आवाहन विश्वास ग्रुपचे कुटुंबप्रमुख विश्वास लीलावती जयदेव ठाकूर व रेडिओ विश्वासच्या समन्वयक ऋचिता ज्योती विश्वास ठाकूर यांनी केले आहे.
