बंगळुरू ( प्रतिनिधी )आयपीएल 2025 च्या हंगामाचे जेतेपद रॉयल चॅलेंजर्स बंगळुरू या संघाने पटकावले. या विजयानंतर भारतभरात विजयोत्सव साजरा करण्यात आला. अजूनही बंगळुरू शहरात हा विजयोत्सव संपलेला नाही. असे असताना बंगळुरू शहरातून मोठी माहिती समोर येत आहे. येथे आयोजित करण्यात आलेल्या विजयी रॅलीला गालबोट लागले आहे. या रॅलीत चेंगराचेंगरी झाली असून तब्बल 11 जणांचा मृत्यू तर 20 पेक्षा जास्त लोक जखमी झाले आहेत. दरम्यान, जखमींची संख्या मोठी असल्याने मृतांचा आकडा वाढण्याची शक्यता आहे.RCB चा IPL 2025 मधील पहिला विजेतेपद साजरं करण्यासाठी आज संध्याकाळी 5 ते 6 वाजेपर्यंत स्टेडियममध्ये सन्मान समारंभ आयोजित करण्यात आला होता. या सोहळ्यासाठी हजारो चाहत्यांनी स्टेडियमबाहेर गर्दी केली होती. टीमचे एक झलक पाहण्यासाठी झालेल्या धक्काबुक्कीत गेटवर चेंगराचेंगरी झाली.जखमी आणि मृतांना तत्काळ बॉवरिंग रुग्णालयात नेण्यात आलं. यामध्ये काहींना गंभीर दुखापती झाल्याचं वैद्यकीय सूत्रांनी सांगितलं आहे. मृतांमध्ये एका महिलेसह दोन युवकांचा समावेश असल्याचं प्राथमिक माहितीतून समोर आलं आहे.बेंगळुरु पोलिसांनी आज सकाळीच एक वाहतूक आणि गर्दी नियंत्रणावरील नियमावली जाहीर केली होती. त्यात त्यांनी दुपारी 3 ते रात्री 8 या वेळेत विधानसभा आणि स्टेडियम परिसर टाळण्याचं आवाहन केलं होतं. याशिवाय, पोलिसांनी स्पष्ट केलं होतं की कोणतीही विजय मिरवणूक होणार नाही आणि साजरा केवळ स्टेडियममध्येच मर्यादित राहील.या अपघातानंतर राज्य सरकार आणि पोलिस प्रशासनाकडून उच्चस्तरीय चौकशीचे आदेश देण्यात आले आहेत. अशा प्रसंगी पुरेशी सुरक्षा आणि गर्दी नियंत्रणाची उपाययोजना करण्यात आली होती का, याची तपासणी केली जाणार आहे.RCB च्या ऐतिहासिक विजयाचं उत्सवमय वातावरण एका क्षणात हळव्या आणि हृदयद्रावक वळणावर आलं. सोशल मीडियावरही चाहत्यांनी या घटनेबद्दल दु:ख व्यक्त केलं असून मृतांच्या कुटुंबियांसाठी संवेदना व्यक्त केल्या जात आहेत.
