सिन्नर (प्रतिनिधी ) छत्रपती शिवाजी महाराजांच्या जयंतीनिमित्त सिन्नर येथील मातोश्री चं. व अ. चांडक कन्या विद्यालय परिसर अक्षरशः शिवमय झाला होता. स्वराज्याच्या विचारांचा निनाद, शौर्याच्या स्मृतींची उजळणी आणि संस्कारांची साक्ष देणारा हा सोहळा विद्यार्थिनींच्या मनात प्रेरणेची अखंड ज्योत प्रज्वलित करून गेला.
भगव्या पताका, आकर्षक रांगोळ्या आणि शिवकालीन सजावटीने विद्यालय नटले होते. “जय भवानी, जय शिवाजी”च्या घोषणांनी वातावरण दुमदुमत होते. कार्यक्रमाची मंगल सुरुवात शिवरायांच्या प्रतिमेचे पूजन व दीपप्रज्वलनाने झाली. मुख्याध्यापिका सौ. सुनिता कर्डिले यांच्या हस्ते प्रतिमेस पुष्पहार अर्पण करण्यात आला.
प्रास्ताविक मनोगतात मुख्याध्यापिका कर्डिले यांनी शिवरायांच्या पराक्रम, दूरदृष्टी आणि लोकाभिमुख राज्यकारभाराचा प्रभावी आढावा घेत विद्यार्थिनींना स्वाभिमान, शिस्त आणि कर्तृत्व यांचा वारसा जपण्याचे आवाहन केले.
पर्यवेक्षिका सुवर्णा सोनवणे यांनी आपल्या मनोगतातून शिवरायांच्या नेतृत्वगुणांचे आणि जिजाऊंच्या संस्कारमूल्यांचे महत्त्व अधोरेखित केले. शिक्षण, चारित्र्य आणि राष्ट्रभक्ती यांच्या संगमातूनच सशक्त समाज घडतो, असा संदेश त्यांनी दिला.
या विशेष प्रसंगी विद्यार्थिनींनी छत्रपती शिवाजी महाराज, राजमाता जिजाऊ, सईबाई, सोयराबाई तसेच संभाजी महाराज यांच्या वेशभूषा साकारून इतिहास जणू सजीव केला. त्यांच्या आत्मविश्वासपूर्ण सादरीकरणातून शिवकालीन तेजाची अनुभूती सर्वांना लाभली.
यानंतर शालेय परिसरातून वेशभूषाधारी विद्यार्थिनींसह शिवाजी महाराजांच्या प्रतिमेची भव्य शोभायात्रा काढण्यात आली. घोषणांच्या गजरात आणि स्वराज्याच्या जयघोषात निघालेल्या या शोभायात्रेने परिसर देशभक्तीने भारावून टाकला.
सांस्कृतिक कार्यक्रमात श्रद्धा गाढवे, आराध्या गोळेसर व आरोही ठोके यांनी प्रभावी भाषणे सादर केली. श्रेया राजपुरे हिने सादर केलेल्या जोशपूर्ण पोवाड्याने शौर्याची लहर निर्माण केली, तर शिक्षिका तृषाली बोडके यांनी दमदार पोवाड्याद्वारे वातावरणात नवचैतन्य फुलवले. इयत्ता सातवीच्या विद्यार्थिनींनी ‘राजं आलं, राजं आलं जी’ हे समूहगीत तसेच ‘आम्ही शिवरायांच्या वाघिणी, आम्ही शिवकन्या’ हे समूहनृत्य सादर करत स्त्रीशक्ती व स्वाभिमानाचा संदेश दिला.
कार्यक्रमादरम्यान शालेय समिती अध्यक्ष अॅड. श्रीराम क्षत्रिय तसेच पालक-शिक्षक संघाचे उपाध्यक्ष गोरक्ष सोनवणे यांनी विद्यार्थिनींच्या सादरीकरणाचे मनःपूर्वक कौतुक केले व ही पिढी शिवरायांच्या आदर्शांवर चालणारी आहे, असा विश्वास व्यक्त केला.
संपूर्ण कार्यक्रमाचे सूत्रसंचालन विद्यार्थिनी आरोही ठोके हिने आत्मविश्वासपूर्ण आणि ओजस्वी शब्दांत अत्यंत सुरेखरीत्या पार पाडले. तिच्या प्रभावी निवेदनामुळे कार्यक्रमाची रंगत अधिकच खुलली.
कार्यक्रमाच्या अखेरीस सर्वांनी एकमुखाने “शिवगर्जना” देत छत्रपतींच्या कार्याला अभिवादन केले. विद्यार्थिनींना खाऊ वाटप करून शिवजन्मोत्सवाचा हा भव्य आणि प्रेरणादायी सोहळा उत्साहपूर्ण वातावरणात संपन्न झाला.
हा उत्सव केवळ एक दिवसाचा सोहळा नव्हता, तर स्वराज्याच्या मूल्यांची बीजे विद्यार्थिनींच्या अंतःकरणात पेरणारा संस्कारोत्सव ठरला. शिवरायांचे तेज, जिजाऊंचे संस्कार आणि संभाजी महाराजांचे शौर्य यांची प्रेरणा देणारा हा कार्यक्रम भावी पिढीसाठी दीपस्तंभ ठरेल, यात शंका नाही.
