लेखिका : नूतन अशोक मुळणकर
परिचय लेख : प्रा. सुरेश नारायणे, अध्यक्ष, म.सा.प. शाखा नांदगाव
आजच्या वेगवान, ताणतणावग्रस्त जगात मानवी मनाला सकारात्मकतेचे आत्मीय बळ देणारे हे पुस्तक म्हणजे — ‘जीवन सुंदर आहे!’
समाजात नकारात्मकतेचा प्रभाव वाढत चालला आहे. सतत तक्रारी, निराशा आणि मानसिक खच्चीकरणाच्या सावल्या आपल्या भोवती फिरताना दिसतात. अशा वेळी नूतन मळणकर यांनी आपल्या संवेदनशील लेखणीतून हे पुस्तक लिहून जणू प्रकाशाचा एक दीपच पेटवला आहे.
या पुस्तकाचा मुख्य गाभा म्हणजे “सकारात्मकतेने जगणे हीच खरी जीवनकला!”
लेखिका सांगते — उदासीनता ही कोणत्याच व्यक्तीची मालकी नाही, तर आपण ज्या विचारांच्या लोकांमध्ये राहतो, त्यावर ती ठरते. म्हणूनच नकारात्मक लोकांपासून दूर राहणे आणि स्वतःच्या मनात सकारात्मकतेचे बीज पेरणे अत्यंत आवश्यक आहे
पुस्तकाची वैशिष्ट्ये :
या पुस्तकात एकूण १६ प्रेरणादायी लेख आहेत. शेवटचा लेख पत्र स्वरूपात असून, मनातील ओलावा आणि आत्मसंवाद याचे सुंदर चित्रण त्यात दिसते.
लेखिकेने हे पुस्तक आपल्या वडिलांना अर्पण केले आहे — जे स्वतः सकारात्मकतेचा साक्षात स्रोत होते. यामुळे पुस्तकात भावनिकता आणि अनुभवाचा मिलाफ दिसतो.
विविध विचारवंतांचे संदर्भ — डेल कार्नेगी, विल्यम ऑस्लर, दलाई लामा, जॉन्सन, व.प. काळे, अल्बर्ट आईन्स्टाईन, गौतम बुद्ध, जोनाथन स्विफ्ट इत्यादींच्या विचारांनी लेख अधिक सशक्त झाले आहेत.
पुस्तकातील प्रमुख विषयवस्तू
छंदाचे महत्त्व : “No man is really happy or safe without a hobby” — छंद हा मानसिक आरोग्याचा आधारस्तंभ आहे, हे लेखिका उत्कटतेने सांगतात.
प्रौढत्व व सेवानिवृत्तीचे जीवन : “स्वतःसाठी जगण्याचा अमूल्य काळ!” असा विचार त्यांनी मांडला आहे.
सकारात्मक अंतर्मनाची किमया : “नकारात्मक लोकांपासून दूर राहा, त्यांच्या प्रत्येक समाधानासाठी एक समस्या असते.”
जीवन कौशल्ये व आनंदाचे तत्वज्ञान : दलाई लामांचा विचार — “The purpose of our lives is to be happy.”
अपेक्षा विरहित जीवन : “अपेक्षाएं जहां खत्म होती है, सकून वहीं से शुरू होता है.”
जीवनातील छोट्या क्षणांचा आनंद : “Enjoy the little things in life…” या विचाराने जीवनाचा सौंदर्यबोध खुलवला आहे.
सारांश :
नूतन मुळणकर यांचे ‘जीवन सुंदर आहे!’ हे केवळ पुस्तक नाही, तर प्रत्येक निराश मनाला उमेद, प्रेरणा आणि आत्मविश्वासाचे औषध आहे.
हे पुस्तक सांगते —
“जीवन सुंदर बनवायचे असेल, तर परिस्थिती नव्हे; दृष्टिकोन बदला.”
सकारात्मकतेची बीजे मनात रुजवू इच्छिणाऱ्या प्रत्येकाने हे पुस्तक नक्की वाचावे.
हे पुस्तक म्हणजे मनःशांती, प्रेरणा आणि प्रसन्नतेचा शाश्वत झरा आहे.
“जीवन सुंदर आहे!” – हे पुस्तक प्रत्येकाच्या संग्रहात असायलाच हवे!
कारण ते आपल्याला सतत सांगते —
“जीवन खरंच सुंदर आहे… फक्त त्याकडे पाहण्याचा दृष्टिकोन सुंदर असावा!”
