नाशिक प्रतिनिधी:
नाशिक शहरातील तपोवन भागातील अनधिकृत वृक्षतोड त्वरित थांबवावी, या पर्यावरणपूरक मागणीला बळ देण्यासाठी साहित्यकणा फाउंडेशनने एका आगळ्यावेगळ्या काव्य मैफिलीचे आयोजन केले आहे. ‘वृक्ष वाढवा, वृक्ष जगवा, वृक्षाची तोड थांबवा’ या महत्त्वपूर्ण विषयावर आधारित ही विशेष काव्य मैफिल दिनांक ३० नोव्हेंबर २०२५ रोजी सकाळी १० वाजता हनुमान मंदिर, तपोवन, नाशिक येथे संपन्न होणार आहे.
तपोवन येथील वृक्षांचे महत्त्व अधोरेखित करण्यासाठी आणि त्यांची कत्तल थांबवण्यासाठी या कार्यक्रमात ५० कवी आपल्या संवेदनशील कवितांच्या माध्यमातून पर्यावरण रक्षणाचा जोरदार संदेश देतील.
या महत्त्वपूर्ण काव्य संमेलनाच्या अध्यक्षपदी ज्येष्ठ समाजसेविका, पर्यावरण प्रेमी आणि नमस्ते फाउंडेशनच्या अध्यक्षा सौ. स्नेहल देव या भूषवणार आहेत. तसेच, साहित्यकणा फाउंडेशनचे अध्यक्ष मा. संजय गोराडे यांची या कार्यक्रमासाठी विशेष उपस्थिती लाभणार आहे.
या मैफिलीचे मुख्य आकर्षण म्हणजे, या ५० कवींनी सादर केलेल्या सर्व कवितांचे एक संयुक्त निवेदन तयार करण्यात येणार आहे. हे निवेदन मा. जिल्हाधिकारी, नाशिक आणि मा. मंत्री गिरीश महाजन यांच्याकडे सुपूर्द केले जाणार आहे, जेणेकरून तपोवनातील वृक्षतोडीचा विषय थेट शासनापर्यंत पोहोचेल आणि त्यावर ठोस उपाययोजना केली जाईल.
साहित्य आणि सामाजिक बांधिलकीचा अनोखा संगम असलेल्या या कार्यक्रमास नाशिककरांनी पर्यावरणाच्या या लढ्यात सहभागी होण्यासाठी मोठ्या संख्येने उपस्थित राहावे, असे आवाहन साहित्यकणा फाउंडेशनचे सचिव विलास पंचभाई यांनी केले आहे.
